जोडूनियां कर चरणीं ठेविला माथा ।परिसावी विनंती माझी सद्गुरूनाथा ॥ १ ॥
असो नसो भाव आलों तुझिया ठाया ।कृपादृष्टीं पाहें मजकडे सद्गुरूराया ॥ २ ॥
अखंडित असावें ऐसे वाटतें पायीं ।सांडूनी संकोच ठाव थोडासा देई ॥ ३ ॥
तुका म्हणे देवा माझी वेडीवांकुडी ।नामें भवपाश हातीं आपुल्या तोडी ॥ ४ ॥
उठा पांडुरंगा आतां दर्शन द्या सकळां ।झाला अरूणोदय सरली निद्रेची वेळा ॥ १ ॥
संत साधू मुनी अवघे झालेती गोळा ।सोडा शेजे सुखें आतां बघूं द्या मुखकमळा ॥ २ ॥
रंगमंडपीं महाद्वारीं झालीसे दाटी ।मन उतावीळ रूप पहावया दृष्टी ॥ ३ ॥
राही रखुमाबाई तुम्हां येऊं द्या दया ।शेजे हालवूनी जागे करा देवराया ॥ ४ ॥
गरूड हनुमंत उभे पाहती वाट ।स्वर्गीचे सुरवर घेऊनि आले बोभाट ॥ ५ ॥
झाले मुक्तद्वार लाभ झाला रोकडा ।विष्णुदास नामा उभा घेऊनि कांकडा ॥ ६ ॥
भेटी लागीं जीवा लागलीसे आस ।पाहे रात्रंदिवस वाट तुझी ॥ १ ॥
पूर्णिमेचा चंद्रमा चकोराजीवन ।तैसे माझे मन वाट पाहे ॥ २ ॥
दिवाळीच्या मुळा लेकी आसावली ।पाहतसे वाटुली पंढरीची ॥ ३ ॥
भुकेलिवा बाळ अति शोक करी ।वाट पाहे परी माऊलीची ॥ ४ ॥
तुका म्हणे मज लागलीसे भूक ।धांवुनी श्रीमुख दावीं देवा ॥ ५ ॥
उठा उठा श्रीसाईनाथ गुरू चरणकमळ दावा ।आधि व्याधि भवताप वारुनी तारा जडजीवा ॥ धृ ॥
गेली तुम्हां सोडुनी भवतम रजनी विलासली ।किरणें अंतरीं प्रबोधिनी आनंदें दाटली ॥
बोले विहंगम मनोहर निर्गुणी गुंफावली ।करूनि दर्शन मुकापणीं प्रणिपात करिती ॥ १ ॥
जागे होऊनि आळस झडुनी निपुण करिती सेवा ।भक्तजन सारे उभे राहुनी करिती तुझी स्तुति देवा ॥ २ ॥
काकड आरती करितो साईनाथ देवा ।चिन्मय रूप दाखवी घेउनि बालक लघू सेवा ॥ धृ ॥
काम क्रोध मद मत्सर आटूनि काकडा केला ।वैराग्याचे तूप घालूनि मी तो भिजविला ॥
साईनाथ गुरू भक्ती ज्वलने तो मी पेटविला ।तद्वृत्ती जाळुनि गुरूने प्रकाश पाडिला ॥ १ ॥
द्वैत तमा नासूनि मिळवी तत्स्वरूपीं जीवा ।चिन्मय रूप दाखवी घेउनि बालक लघू सेवा ॥ २ ॥
भू भूवः स्वः स्वर्ग लोक अताळीं पाताळीं ।व्यापुनि राहिलासी स्वामी तूं भक्तांनुकूळीं ॥
ऐसे तुझें रूप गुरूराया दृष्टीसी ना मिळे ।म्हणूनि काकड आरती करूनी पाहतो तुज डोळे ॥ ३ ॥
साईनाथ गुरू माझी आई ।मजला ठाव द्यावा पायीं ॥ धृ ॥
दत्तराज गुरू माझी आई ।मजला ठाव द्यावा पायीं ॥
श्रीसच्चिदानंद सद्गुरू साईनाथ महाराज की जय ॥